mathau o faethu

Dydy hyd gofal maeth tymor byr Gwynedd ddim yn hollol sefydlog – gallai olygu oriau, dyddiau, misoedd neu flwyddyn efallai. Mae’n dibynnu ar beth sydd orau i’r plentyn. Yn y pen draw, mae’n ymwneud â darparu lle diogel tra bydd cynlluniau’n cael eu gwneud ar gyfer y tymor hwy.

Rydyn ni’n gweithio gyda’n gofalwyr maeth tymor byr tuag at sicrhau paru yn y ‘tymor hir’ (sydd weithiau’n cael ei alw’n sefydlogrwydd) pan mai dyma’r opsiwn gorau i’r plentyn. Mae rôl y rhiant maeth tymor byr yn un bwysig – rydych chi’n cynnig yr holl gefnogaeth a gofal sydd eu hangen ar y plentyn, ond rydych chi hefyd yn ei helpu i gymryd y cam nesaf pan fydd yn barod i fynd yn ôl at ei teulu, at deulu maeth newydd neu i gael ei fabwysiadu.

Byddech chi’n anghywir pe baech chi’n meddwl bod tymor byr yn golygu ‘llai’ mewn unrhyw ffordd. Mae’r math yma o faethu yn bwysig iawn – dyma’r cam cyntaf yn aml ar daith newydd sy’n wahanol i bob plentyn yn ein gofal.

Beth yn union yw tymor hir? Wel, mae’n ymwneud â diogelwch, derbyn a chartref newydd i blant sy’n methu aros gyda’u teuluoedd.

Rydyn ni wedi ymrwymo i ddod o hyd i’r teulu maeth cywir ar gyfer pob plentyn. Gyda gofal maeth tymor hir, mae’n golygu edrych ymlaen a gwneud y penderfyniad i fod yno – i fod yn deulu – heb derfynau amser. Rydych yn cynnig sefydlogrwydd a rhywbeth parhaol, efallai am y tro cyntaf.

Lle i anadlu – mae ei angen ar bob un ohonon ni weithiau. A dyna’n union beth mae seibiant byr yn ei gynnig, i blant a rhieni. 

Gyda seibiant byr (sydd weithiau’n cael ei alw’n ‘ofal cymorth’) rydych chi’n cynllunio ymweliadau ymlaen llaw oddi wrth brif ofalwyr y plentyn. Gall hyn fod dros nos, rhywbryd yn ystod y dydd neu ar benwythnosau. Weithiau, mae seibiant byr yn drefniant rheolaidd. Ar adegau eraill, rydych chi’n cynnig help llaw – rydych chi’n camu i mewn pan fydd eich angen fwyaf. 

Prif fantais seibiant byr yw bod plant yn cael cyfle i brofi pethau newydd a gweld lleoedd newydd, ynghyd â chael cyfleoedd newydd. Gyda’r math yma o ofal maeth, rydych chi’n teimlo beth mae’n ei olygu i fod yn rhan o gymuned – mae’n golygu dod at eich gilydd, gan wneud rhywbeth sy’n gallu ymddangos fel rhywbeth bach, ond sy’n cael effaith fawr. 

Mae gan rai o’r bobl ifanc yn ein gofal blant eu hunain. Fel teulu maeth i rieni ifanc a phlant, gallwch rannu’r holl ddoethineb a phrofiad sydd gennych chi â rhywun sydd ddim yn barod i roi cynnig arni ar ei ben ei hun. Mae’n ymwneud â magu’r genhedlaeth nesaf, gan ddangos cariad a gofal, er mwyn iddyn nhw allu gwneud yr un fath.

Rydyn ni’n cefnogi ein gofalwyr therapiwtig yn yr holl ffyrdd amrywiol maen nhw ein hangen ni. Mae pob plentyn sydd ag anghenion mwy cymhleth – boed yn emosiynol neu’n ymddygiadol – yn unigolyn, ac efallai y bydd angen gwahanol fath o ofal ar bob un. Ein rôl ni yw canfod yn union beth allai hynny fod, a rôl y gofalwr therapiwtig yw bod yno – i gynnig sefydlogrwydd a gofal.