Mae gofalwyr maeth yng Ngwynedd yn dathlu cyfraniad hollbwysig eu plant eu hunain at y daith faethu.
Yn ystod Wythnos Plant Gofalwyr Maeth (13 – 19 Hydref), bydd gofalwyr Maethu Cymru Gwynedd yn rhannu hanesion am y ffyrdd mae eu plant wedi helpu i wneud i’r rheini sydd mewn gofal deimlo yn fwy hapus a diogel, a bod mwy o groeso a chariad iddynt.
Mae rhai pobl yn dweud mai un o’r pethau sy’n eu rhwystro rhag dod yn ofalwr maeth yw’r effaith bosib y bydd hyn yn ei chael ar eu plant, ond mae llawer o blant yn gweld manteision bod yn rhan o deulu sy’n maethu. Mae gweld bywyd o safbwynt rhywun arall yn gallu bod yn brofiad cyfoethog sy’n medru helpu plentyn i ddysgu a datblygu fel unigolyn. Mae plant hefyd yn medru meithrin eu perthynas eu hunain gyda phlant maeth yn eu cartref.
Mae Karen a Marc wedi bod yn maethu gyda’u hawdurdod lleol, Maethu Cymru Gwynedd, ers 2016, ac maent wedi cael cefnogaeth eu tri phlentyn – Emma, Ben a Lewis – bob cam o’r ffordd. I’w plant nhw, mae maethu yn golygu mwy na rhannu eu tŷ; maent wedi croesawu pob plentyn fel gwir aelod o’r teulu.
Dros y blynyddoedd, mae’r teulu wedi rhoi cariad, sefydlogrwydd a chysur i blant sy’n wynebu dechrau anodd iawn i’w bywydau – o fabis bach newydd-anedig i blant ifanc sydd ag anghenion ychwanegol.
Mae eu merch hynaf, Emma – sy’n 21 oed erbyn hyn – wedi rhannu ei phrofiad teimladwy o gael ei magu fel rhan o deulu maethu drwy Maethu Cymru Gwynedd.
“Mae wedi bod yn brofiad hyfryd rhoi’r cariad, y diogelwch a’r gefnogaeth y mae’r plant yn haeddu. Mae gwybod eich bod wedi eu helpu i dyfu i bwy maen nhw fod yn rhywbeth arbennig iawn.
“Mae pobl yn gofyn yn aml sut mae’n teimlo pan fo’r plant yn gadael. A bod yn onest, mae bob amser yn chwerwfelys. Rydym yn dod mor agos atyn nhw – maen nhw’n teimlo fel rhan o’r teulu – felly mae’n anodd ffarwelio â nhw. Ond ar yr un pryd, mae’n braf iawn gwybod eu bod yn symud ymlaen i gael dechrau o’r newydd, fel y maent yn ei haeddu. Mae eu gweld nhw’n hapus, wedi setlo ac yn gwneud yn dda yn gwneud y cwbl yn werth chweil. A phan rydym yn cadw mewn cysylltiad ac yn gweld eu cynnydd, mae’n ein hatgoffa o bwysigrwydd maethu.”
